V.
Izleigšona ar Dīvu.
1 Tai tad, mums, caur ticeibu attaisnōtim, ir mīrs pi Dīva caur myusu Kungu Jezu Kristu. 2 Pateicūt ticeibai caur Jū mes sajēmem īeju tamā žēlesteibā, kurā asom un līksmojam par cereibu uz Dīva (bārnu) gūdu. 3 Bet na tikai par tū, mes līksmojam arī par apspīsšonom, jo mes zynom, ka apspīsšonā rūdās pacīteiba, 4 pacīteibā iztureiba, iztureibā cereiba, 5 bet cereiba myusu napīviļ; jo myusu sirdīs ir īlīta Dīva mīlesteiba caur Svātu Goru, kas mums ir dūts. 6 Un koleidz mes vēļ bejom bezspēceigi Kristus sovā laikā par grēcinīkim nūmyra. 7 Reši kod kaids mērst taisneigō dēļ. Labdara dēļ veļ kaids varbyut īsadrūšynōs mērt, 8 bet Dīvs sovu mīlesteibu uz mums parōda caur tū, ka Kristus par mums nūmyra tod, kod mes bejom vēļ grēcinīki. 9 Un jo mes tagad caur Jō asni asom attaisnōti, tū vairōk caur Jū nu dusmes byusim pasorgōti. 10 Jo tad mes īnaidnīki byudami, caur Jō Dāla nōvi ar Dīvu izleigom, tū vairōk izleiguši, caur Jō dzeivi byusim izpesteiti. 11 Un na tik vin tys, bet mes arī līksmojam ikš Dīva caur myusu Kungu Jezu Kristu, caur kū mes tagad asom sajāmuši izleigšonu.
Odumsun Kristus.
12 Tōpēc, kai caur vīnu cylvāku pasaulī nōce grāks un caur grāku nōve, tai nōve pōrgōja uz vysim cylvākim, jo jymā vysi sagrākōja. 13 Arī pyrms lykuma pasaulī beja grāks, tik grāks natyka īskaiteits, jo nabeja nikaida lykuma. 14 Nu Oduma leidz Moizešam nōve vaļdeja arī par tim, kas caur pōrkōpumu nabeja sagrākōjuši, kai Odums, kurs ir nōkūšō (Pesteitōja) tips.
15 Ar žēlesteibu tūmār nav tai, kai ar pōrkōpumu. Jo vīna sagrākōšonas dēļ nōvei ir padūti vysi, tū vairōk un bogōteigōk vīna cylvāka — Jezus Kristus dēļ nōce par vysim Dīva žēlesteiba un žēlesteibas dōvona. 16 Ar zēlesteibu nav tai, kai ar vīna grāku. Vīna (grāka) dēļ tīsa nūtīsoj, bet žēlesteiba attaisnoj nu daudzim grākim. 17 Jo vīna grāka dēļ, caur tū vīnu vaļdēja nōve, tū vairōk tī, kas sajam žēlesteibas pōrpiļneibu, pīdūšonu un attaisnōšonu, caur vīnu Jezus Kristus, vaļdeis dzeivē.
18 Tai tad, kai caur vīna grākā krisšonu vysim ļaudim nōce pazusšona, tai caur vīna taisneigū dorbu vysim ļaudim nōce attaisnōšona, kas dūd dzeivi. 19 Kai vīna cylvāka napaklauseibas dēļ daudzejī palyka grēcinīki, tai vīna paklauseibas dēļ daudzejī byus attaisnōti. Lykums ir nōcis, lai vairōtūs grāks. 20 Un kur vairōjōs grāks, tur vēļ bogōteigōk pōrspēja žēlesteiba, 21 lai, kai grāks vaļdeja nōvē, tai žēlesteiba caur myusu Kungu Jezu Kristu vaļdeitu caur attaisnōšonu uz myužeigu dzeivi.
© Aloizius Broks: Svātī roksti. Jezus Kristus Evangelijs und Apostolu Darbi 1933, Apostols vystules i apokalypsis 1937.
