XIII.
1 Jyusūs arvīnu lai mōjoj brōliska mīlesteiba! 2 Naaizmērstit par vīsmīleibu, jo caur tū daži, poši tō nazynōdami, pi sevis ir pījāmuši engeļus. 3 Pīminit par cītumnīkim, itkai poši byutu reizē cītumā īslūdzeiti, kai arī par cītūšajim, jo arī poši mīsā dzeivojat. 4 Lauleibā visim jōir gūdeigim un laulōtūs guļamvītai jōir nasatraipeitai, jo palaidnīkus un lauleibas lauzējus tīsōs Dīvs. 5 Jyusu dzeive lai ir breiva nu montkōreibas, esit pīticeigi ar tū, kas jums ir, jo pats Dīvs ir sacejis: Es tevis naatstōšu un napamesšu. 6 Tōpēc mes drūši varam saceit: Kungs ir muns paleigs un es nanūsabeišu, kū tad cylvāks man spēs padareit?
7 Pīminit jyusu prīkšnīkus, kuri jums sludynōja Dīva vōrdu. Raugatēs uz jūs dzeives nūslāgumu un dorit pakaļ jūs ticeibai. 8 Jezus Kristus ir tys pats vakar, šudiņ un myužam. 9 Naļaunit sevis maldynōt ar dažaidom svešom mōceibom. Lobōk ir sirdi styprynōt ar žēlesteibu na kai ar bareibu, kura nikō napaleidzēja tim, kuri jū ījēme. 10 Mums ir upuru oltors, nu kura nadreikst ēst tī, kas kolpoj nūmetnei, 11 jo ōrpus nūmetnes sadadzynōja tūs lūpu gaļu, kuru asni vērsgoreidznīks nese vyssvātōkajā pōrlyugšonai par grākim. 12 Tōpēc arī Jezus, lai ar sovu asni svātdareitu tautu, cīte ōrpus piļsātas vōrtim. 13 Īsim tad arī mes pi Jō ōrpus nūmetnes un jimsim uz sevis Jō pazamōšonu. 14 Mums te nav pastōveigais miteklis, bet gon mes steidzamēs pēc nōkamō. 15 Upurēsim tad Dīvam caur Jū vysod slavas upurus, tys ir sovu lyupu augļus, kas slavej Jō vōrdu. 16 Naaizmērstit želesteibas dorbu un labdareibas; taidas dōvonas Dīvam ir pateikamas.
17 Sovim prīkšnīkim esit paklauseigi un padeveigi, jo jī ir nūmūdā par jyusu dvēselem, un jim reizi vajadzēs nūdūt nūrēkinu, — un tys jōdora ar prīcu, bet na ar nūpyutom, jo pādejais jums nikō loba nadūs.
18 Lyudzitēs par mums. Mes asom pōrlīcynōti, ka mums sirdsapziņa ir teira, jo mes cenšamēs vysu dareit labi. 19 Un tū vairōk es pamūdynoju jyusus tū dareit, lai jums ōtrōk mani atdūtu.
Nūslāgums.
20 Lai mīra Dīvs, kas myusu Kungu Jezu (Kristu), tū izcylus Vušku Ganeitōju caur myužeigō īstōdejuma asni pīcēle nu myrūnim, 21 styprynoj jyusus ikvīnā lobā, ka jyus izpiļdeitu Jō grybu. Lai Jys caur Jezu Kristu jyusūs padora tū, kas Jam ir pateikams. Jam lai ir gūds nu myuža uz myužim! Amen.
22 Es jyusus, brōli, lyudzu pījemit labi šytūs pamūdynōjuma vōrdus, lai gon es jums tikai eisumā saraksteju.
23 Jyus zynot, ka myusu brōļs, Timotejs ir otkon atbreivōts un jo jys ōtri atnōks, es kūpā ar jū jyusus redzēšu.
24 Sveicynojit vysus sovus prīkšnīkus un vysus svātūs. Jyusus sveicynoj tī, kas ir Italijā.
25 Žēlesteiba lai ir ar jums visim! Amen.
© Aloizius Broks: Svātī roksti. Jezus Kristus Evangelijs und Apostolu Darbi 1933, Apostols vystules i apokalypsis 1937.
