III.
Jōņs Kristeitōjs.
1 Pīcpadsmytajā keizara Tiberija vaļdeišonas godā, kad Pontijs Pilats pōrvaļdeja jūdu zemi, kad Erods beja Galilejas tetrarchs, un jō brōļs Filipps — Iturejas un Trachonitis apgobola, un Lizanijas Abilenes tetrarchs, 2 kad par vērsgoreidznīkim beja Annass un Kaifass, Dīva bolss atsasauce uz Zacharija dālu Jōni tuksnesī. 3 Jys apstaigōja vysu Jordana apgobolu, sludynōdams grāku atlaisšonai grāku vaidēšonas kristeibu, kai ir raksteits pravīša Izaja pravītōjumu grōmotā:
4 Tuksnesī saucūšs bolss:
sagatavojit Kungam ceļu,
padorit taisnas Jō stygas.
5 Ikvīnai īlejai jōbyun pīpiļdeitai,
ikvīnam kolnam un kaļneņam pazamynōtam,
leikumim — izklainōtim
un naleidzonumim padareitim par leidzonu ceļu.
6 Tūlaik ikvīns cylvāks īraudzeis Dīva pesteišonu.
7 Ļaužu pulkim, kas gōja uz jū kristeibas pījimtu, jys saceja: Čyusku dzymums! Kas jums apgolvōja, ka jyus izbēgsit nu tyvojūšōs dusmes? 8 Dūdit tad grāku vaidēšonai atteiceigus augļus un nasokit: Mums Abraams ir tāvs. Es tadei jums soku: Dīvs spēj nu šitim akminim Abraamam dālus izsaukt. 9 Cērvs jau ir klōtu pi kūka saknes; ikvīns kūks, kas nadūd lobu augļu, tiks izcērsts un gunī īmasts.
10 Un ļaužu pulki vaicōja nu jō saceidami: Kas mums jōdora? 11 Jys atbiļdēja: Kam ir diveji svōrki, tys lai īdūd tam, kam nava; ari tys, kam ir ēdīņs, lai tai pat dora.
12 Ari muitinīki gōja kristeibas pījimtu. Jī vaicōja: Mōceitōj, kas mums doroms? 13 Jys tim atbiļdēja: Napīprosit vairōk, kai jums ir pazeimōts.
14 Tai pat ari karaveiri nu Jō vaicōja: Kas tad mums doroms? Jys tim atbiļdēja: Nadorit nivīnam pōresteibas, namōnejit, bet gon esit mīrā ar sovu olgu.
15 Ļaudis beja uzbūdynōti. Jī sevī pōrdūmōja: Vai Jōņs tik nav Kristus. 16 Jōņs atbyldādams saceja visim: Es jyusus krystu ar yudini, bet pēc manis nōks par mani spēceigōks. Es naasmu cīneigs atraiseit Jō kūrpem saišku. Jys jyusus kristeis ar Svātū Goru un guni. 17 Jys ar laišku rūku teireis sovu kulu: kvīšus savōks sovā orodā, bet palovas sadadzynōs nadzīstūšajā gunī. 18 Ari daudz cytu pōrsorgōjumu Jys deve ļaudim, sludynōdams tautai Prīceigū Ziņu.
19 Tetrarchs Erods brōļa sīvas Erodiades un cytu ļaunu dorbu dēļ, kurus Erods beja padarejis, sabōrts, 20 klōt pi tō vysa, padareja vēļ tū, ka Jōni īslūdzeja cītumā.
K. Jezus pījam kristeibu.
21 Un nūtyka, ka visi ļaudis pījēme kristeibu, un kad Jezus pēc kristeibas lyudzēs, atsadareja dabasi un 22 Svātais Gors radzamā veidā nūsalaide uz Jō kai bolūds, un nu dabasim atskanēja bolss: Tu esi muns nūmīļōtais dāls; tu maņ īpatiki.
K. Jezus ciļtsgrōmota.
23 Sovas darbeibas īsōkumā Jezus beja ap trejsdesmit godu vacs. Jys tyka dūmōts asam Jezupa dāls, kura (prīkšteči) beja: Heli, 24 Matats, Levi, Melchi, Jannajs, Jezups, 25 Matatias, Amos, Nahums, Heslis, Naggajs, 26 Maats, Matatias, Semejs, Josechs, Joda, 27 Jōņs, Reza, Zorobabeļs, Salatieļs, Nerejs, 28 Melchis, Addejs, Kozams, Elmadams, Hers, 29 Jezus, Eliezers, Jorims, Matats, Levis, 30 Simeons, Jūds, Jezups, Jonašs, Eliakims, 31 Melejs, Menna, Mattats, Natans, Davids, 32 Jesse, Obeds, Boozs, Sala, Naassons, 33 Aminadabs, Admins, Arnejs, Ezroms, Farezs, Juds, 34 Jākubs, Izaaks, Abraams, Tara, Nachors, 35 Saruchs, Regaus, Faleks, Ebers, Sala, 36 Kainams, Arfaksads, Sems, Noes, Lamechs, 37 Matusals, Enochs, Jareds, Malaleels, Kainans, 38 Enos, Sets, Odums, kurs beja Diva (radeits).
© Aloizius Broks: Svātī roksti. Jezus Kristus Evangelijs und Apostolu Darbi 1933, Apostols vystules i apokalypsis 1937.
