I.
1 Pōvuls, Jezus Kristus cītumnīks un brōļs Timotejs myusu nūmiļōtajam leidzstrōdnīkam Filemonam, 2 (nūmīļōtajai) mōsai Apijai, myusu ceiņas bīdram Archipam un draudzei tovā mōjā.
3 Žēlesteiba jums un mīrs nu Dīva myusu Tāva un nu Kunga Jezus Kristus.
4 Es pasateicu sovam Dīvam ikreizes, kai tik es par tevi īgōdoju sovōs lyugšonōs, 5 jo es dzēržu par tū ticeibu un mīlesteibu, kura tev ir uz Kungu Jezu un uz visim svātajim.
6 Lai tova ticeiba, kas tev ar mums ir kūpeja tevi nūvad pi eistōs vysu tūs lobumu atziņas, kas mums ir ikš Jezus Kristus. 7 Par tovu mīlesteibu man beja lels prīks un apmīrynōjums, jo caur tevi, brōļ, svātūs sirdis sasnēdze atspērdzynōjumu. 8 Tōpēc es, lai gon man ikš (Jezus) Kristus byutu piļneiga tīseiba pavēlēt tū, kas pīnōkās, 9 tūmār tovas mīlesteibas dēļ es tevis lyudzu; tai kai es Pōvuls, vacs cylvāks un tagad vēļ Jezus Kristus cītumnīks, 10 es tevis lyudzu par sovu dālu Onezimu, kuram es važōs byudams īdevu dzeivi. 11 Agrōk jys tev beja nalīteigs, bet tagad tev un man ir nūdereigs. 12 Es jū syutu pi tevis atpakaļ; pījem jū kai munu sirdi. 13 Es jū labprōt byutu paturējis pi sevis, ka jys munas Evangelija dēļ apcītynōšonas laikā tovā vītā ryupātūs par mani, 14 tūmār bez tovas pīkrisšonas es nagribēju tō dareit, lai tova labsirdeiba nabyutu vērdzyska, bet gon labprōteiga. 15 Varbyut jys uz laika nu tevis atsaškeire tōdēļ, lai tu jū sajimtu myužam, 16 un vairs na kai vērgu, bet gon, vērga vītā, kai nūmīļōtū brōli; par taidu jys lelā mārā ir man, bet tū vairōk tev, kam jys kai mīseigi, tai arī ikš Kristus pīdar. 17 Jo tevi ar mani saista draudzeibas saitas, tad pījem jū kai mani pošu.
18 Jo jys tev nūdareja zaudējumus, vai arī ir kū porōdā, tad tū pīskaiti man. 19 Es, Pōvuls, rokstu pašrūceigi: Es tū samoksōšu. Es nagrybu pavysam runōt par tū, ka tu man pats sevi esi porōdā. 20 Jā, brōļ, es grybātu tevi ikš Kristus izmontōt; atspērdzynoj ikš Kristus munu sirdi.
21 Pasaļaudams uz tovas gataveibas pakolpōt, es tev rokstu, un zynu, ka tu padareisi vairōk, na kai es soku. 22 Sagatavoj arī dēļ manis nūmetni, jo es ceru, ka jyusu lyugšonu dēļ jums mani dōvynōs atpakaļ. 23 Tevi sveicynoj Epafrass, muns ikš Jezus Kristus leidz cītumnīks, 24 arī muni leidzstrōdnīki: Marks, Aristarchs, Demass un Lukass.
25 Myusu Kunga Jezus Kristus žēlesteiba lai ir ar jyusu goru! (Amen).
© Aloizius Broks: Svātī roksti. Jezus Kristus Evangelijs und Apostolu Darbi 1933, Apostols vystules i apokalypsis 1937.
