III.
Pogōnu pesteišona.
1 Tōpēc es, Pōvuls, asmu deļ jums pogōnim Jezus Kristus gyusteknis. 2 Jyus dzērdējot par Dīva žēlesteibas pōrzynōšonu, kura man dēļ jums ir dūta. 3 Šytys nūslāpums man vīnā redzējumā tyka pasludynōts, kai es nasen eisumā jums raksteju. 4 Kad jyus tū losot, tad jyus varat munu īskotu Kristus nūslāpumā saprast. 5 Agrōkūs laikūs šytys cylvāka bārnim tai sludynōts natyka, kai tagad caur Jō svātim apostolim un pravīšim ikš Gora teik atklōts: 6 Pogōni ir īkš Jezus Kristus leidzmantinīki caur Evangeliju, 7 par kura kolpu es asmu klivis caur Dīva žēlesteibu, kura man ir dūta caur Jō spāka vareibu. 8 Man, tam nu visim svātajim mozōkajam ir dūta tei žēlesteiba, lai sludynōtu pogōnim naizpētamōs Kristus bogōteibas 9 un skaidri apgaismōtu, kai nu myužim pi Dīva, vysu lītu Radeitōja, nūslāptais nūslāpums teik izpiļdeits. 10 Tagad caur Bazneicu jōpasludynoj vērseibom un vareibom dabasūs daudzejaidō Dīva gudreiba. 11 Tys ir Dīva pyrmsmyužeigais lāmums, kuru Jys ikš myusu Kunga Jezus Kristus izpiļdeja. 12 Jymā mums ir drūšeiba un pilni cereibas mes varam tyvōtīs (Dīvam), caur ticeibu ikš Jō. 13 Tōpēc es lyudzu: Napagurstit munūs spaidūs jyusu dēļ, jo tei ir jyusu slava.
14 Tōpēc es kreitu ceļūs pret (myusu Kunga Jezus Kristus) Tāvu, 15 nu kura jam sev nūsaukumu ikvīna saime dabasūs un vērs zemes. 16 Lai Jys dūd jums pēc sovas gūdeibas bogōteibas, ka jyus caur Jō Goru, kas atsateic uz īkšejū cylvāku, byutu stipri un spēceigi, 17 lai jyusu sirdīs caur ticeibu dzeivōtu Kristus, lai jyus byutu stipri īsasakņōjuši un nūsastyprynōjuši mīlesteibā, 18 lai jyus byutu spējeigi reizē ar visim svātajim saprast jōs plotumu, garumu, augstumu un dziļumu, 19 un pazeit ikvīnu saprasšonu pōrspējūšū Kristus mīlesteibu, lai caur tū byutu piļdeiti ar ikvīnu Dīva piļneibu.
20 Bet Jam, kas caur tū spāku, kurs myusūs dorbojās, spēj padareit daudz vairōk, na kai mes varam lyugt un īdūmōt, 21 Jam lai ir gūds Bazneicā un ikš Jezus Kristus nu paaudžu uz paaudzem, nu myužu uz myužim. Amen.
© Aloizius Broks: Svātī roksti. Jezus Kristus Evangelijs und Apostolu Darbi 1933, Apostols vystules i apokalypsis 1937.
