V.
1 Ikvīns, kas tic, ka Jezus ir Kristus, ir pīdzimis nu Dīva. Un ikvīns, kas mīļoj dzymdynōtōju, mīļoj arī tū, kas nu jō ir pīdzimis. 2 Nu tō mes pazeistam vai mes mīļojam Dīva bārnus, ka mes mīļojam Dīvu un pyldam Jō bausleibas. 3 Mīlesteiba uz Dīvu pastōv tamā, ka mes izpyldam Jō bausleibas; un Jō bausleibas nava gryutas. 4 Jo vyss, kas ir dzimis nu Dīva uzvar pasauli. Un tei uzvara, kas pasauli ir uzvarējuse, ir myusu ticeiba.
5 Un kas tad cyts uzvar pasauli, jo na tys, kas tic, ka Jezus ir Dīva Dāls? 6 Jys ir tys, kas atnōce caur yudini un asni un Goru: Jezus Kristus. Un natik vīn ar yudini, bet gon ar yudini un asni. Un Gors ir tys, kas par tū līcynoj; un Gors ir taisneiba.
7 Trejs ir (dabasūs) kas līcynoj: (Tāvs, Vōrds un Svātais Gors, un šitī trejs ir vīns. 8 Un trejs ir vērs zemes, kas līcynoj): Gors, yudiņs un asnis, un šitī trejs ir vīnā.
9 Jo mes pījamam cylvāka līceibu, tad Dīva līceiba par jū ir daudz lelōka. Un Dīvs par sovu Dālu taidu līceibu ir devis.
10 Kas Dīva Dālam tic, tymā ir (Dīva) līceiba. Bet kas Dīvam natic, tys jū īskaita par meli, jo jys natic tai līceibai ar kuru Dīvs ir līcynōjis par sovu Dālu. 11 Un tei līceiba ir šaida: Dīvs deve mums myužeigū dzeivi un tei dzeive ir Jō Dālā. 12 Kam ir Dāls, tam ir arī dzeive, bet kam Dīva Dāla nava, tam nav arī dzeives.
13 Es šytū jums saraksteju, lai jyus zynōtu, ka jums ir myužeigō dzeive, jums, kas tycat Dīva Dāla Vōrdam. 14 Un tei ir cereiba, ka Jys myusus izklauseis, jo mes saskaņā ar jō grybu lyugsim. 15 Un jo mes zynom, ka Jys myusu lyugšonas izklausa, tad mes zynom arī tū, ka lyugtais mums jau ir. 16 Jo kas nūmona, ka jō brōļs dora grāku, kas nav nōveigs, tad lai jys par tū lyudzās un ar tū jam paleidz dzeivē, uz cik tys nav taids grāks, kas nas nōvi. Bet ir arī nōveigs grāks, un es nasoku, lai par tū kas lyugtūs. 17 Ikvīna nataisneiba ir grāks, bet ir arī grāks, kas nōves nanas.
18 Mes zynom, ka tys, kas nu Dīva ir dzimis, nagrākoj. Jo kas nu Dīva ir dzimis, tys sorgojās, un ļaunais jō naaizskar. 19 Mes zynom, ka mes asom nu Dīva, un ka vyss pasauļs ir nūgrimis ļaunumā.
Nūslāgums.
20 Mes zynom, ka Dīva Dāls atnōce un mums īdeve saprasšonu, lai mes pazeitu eistynū (Dīvu). Un mes poši asom eistynajā (Dīvā), un Jō Dālā Jezū Kristū. Un Jys ir eistynais Dīvs un myužeigō dzeive.
21 Bērneņi, sorgojitēs nu elkdīveibas. (Amen).
© Aloizius Broks: Svātī roksti. Jezus Kristus Evangelijs und Apostolu Darbi 1933, Apostols vystules i apokalypsis 1937.
